उन्नाव :- सध्या देशात अंधश्रद्धे तुन गुन्हा होण्याची घटना काही केल्या कमी होत नाहीये अश्यातच उत्तर प्रदेशातील उन्नावमध्ये अंधश्रद्धेचं एक चक्रावून टाकणारं प्रकरण समोर आलं आहे. मोक्ष मिळवण्यासाठी २२ वर्षांच्या तरुणानं जमिनीत समाधी घेतल्याचा प्रकार घडला आहे. ही घटना योग्यवेळी पोलिसांपर्यंत पोहोचली. त्यांनी वेळीच घटनास्थळ गाठलं. त्यामुळे तरुणाचा जीव वाचला. याप्रकरणी पोलिसांनी चार साधुंना अटक केली आहे.
उन्नावमधील बांगरमाऊ परिसरातील ताजपूर गावात हा प्रकार घडला. रविवारी (२५ सप्टेंबर) संध्याकाळी गावातील मंदिराजवळ काही साधू बसले होते. त्यांनी पूजाअर्चना सुरू केली. एक मोठा खड्डा खणला. त्यांनी बघता बघता गावातील शुभम नावाच्या तरुणाला त्या खड्ड्यात उतरवलं. काहींनी याबद्दल विचारणा केली असता शुभम समाधी घेत असल्याचं समजलं. पूजा करण्यात आल्यानंतर काही वेळानं खड्डा पूर्णपणे बुजवण्यात आला. यानंतर घटनेची माहिती पोलिसांना देण्यात आली.
ताजपूर गावातील शुभम नावाच्या तरुणाचा कर्मकांडांवर विश्वास आहे. तो काही दिवसांपूर्वी पुजाऱ्यांच्या संपर्कात आला. समाधी घेतलीस तर सिद्धी प्राप्त होईल, असं पुजाऱ्यांनी शुभमला सांगितल्याची माहिती बांगरमऊचे क्षेत्राधिकारी (सीओ) पंकज कुमार सिंह यांनी सांगितलं. नवरात्रीच्या एक दिवस आधी जमिनीत खड्डा खणून त्यात शुभमला बसवण्यात आलं. त्यानंतर त्याच्यावर माती टाकण्यात आली. याची माहिती ग्रामस्थांनी आम्हाला दिली. त्यानंतर आम्ही घटनास्थळ गाठलं, अशी माहिती सिंह यांनी दिली.
पोलिसांचं पथक घटनास्थळी पोहोचलं त्यावेळी शुभमनं समाधी घेतली होती. ४ साधूंनी त्याला दफन केलं होतं. त्याच्यावर टाकण्यात आलेल्या मातीवर ते लाल झेंडा लावत होते. पोलिसांनी तातडीनं माती हटवली. शुभमला खड्ड्यातून बाहेर काढलं. तो जिवंत होता. घटनास्थळी असलेल्या चार साधूंना अटक करण्यात आली. त्यांच्याविरोधात गुन्हा दाखल करण्यात आला असून त्यांना तुरुंगात पाठवण्याची तयारी सुरू आहे.
आपल्याला मोक्ष हवा होता. त्यामुळे नवरात्रीच्या एक दिवस आधी समाधी घेण्याचा संकल्प सोडल्याचं शुभमनं पोलिसांना सांगितलं. शुभम ४ वर्षांपासून गावाबाहेर झोपडी तयार करून राहत होता. काली मातेची मूर्ती ठेऊन पूजाअर्चना करायचा, असं साधूंनी पोलिसांना सांगितलं. आम्ही त्याला समाधी घेण्यापासून रोखायचा प्रयत्न केला. मात्र त्यानं ऐकलं नाही. त्यामुळे खड्डा खणून त्याला त्यात झोपवण्यात आल्याची माहिती साधूंनी दिली. आईच्या मृत्यूनंतर शुभम पूजाअर्चना करू लागल्याचं ग्रामस्थांनी सांगितलं.
हे वाचलंत का ?
- एरंडोल येथे खोट्या कारवाईचा बनाव करून चहा विक्रेत्याकडून १० हजारांची खंडणी; आ.अमोलदादा पाटील यांचे चार तास पोलीस ठाण्यात ठिय्या आंदोलन
- प्रत्येक बी.एल.ए.ने घराघरात जाऊन मतदारांची अचूक पडताळणी करा – आमदार मा.ॲड.अमोलदादा पाटील.
- एरंडोलला शिवसेनेने दिग्गजांना दिली पक्षीय जबाबदारी…
- एरंडोल येथे भारतरत्न डॉ.बाबासाहेब आंबेडकर जयंती उत्साहात साजरी.
- युतीचे नगराध्यक्ष पदाचे उमेदवार डॉ.नरेंद्र ठाकुर व प्रभाग क्रमांक ३ चे उमेदवार यांच्या प्रचारार्थ भव्य प्रचार रॅली व कॉर्नर सभाचे आयोजन.
