सटाणा :- तालुक्यातील पिंपळकोठे येथील प्राथमिक शाळेतील शिक्षक रमेश शिवराम भामरे यांचा काही दिवसांपूर्वी मृत्यू झाला होता. या घटनेची नोंद जायखेडा पोलीस ठाण्यात अपघाती मृत्यू अशी करण्यात आली होती. मात्र रमेश भामरे यांच्या मृत्यूनंतर पोलीस तपासात धक्कादायक माहिती समोर आली आहे. हा अपघात नसून पुतण्यानेच सदर शिक्षकाचा खून केल्याचं स्पष्ट झालं आहे. याप्रकरणी जायखेडा पोलिसांनी सुजित सुनील भामरे (२९) याला अटक केल्यानंतर त्याने रमेश भांबरे यांचा खून केल्याची कबुली दिली.
याबाबत अधिक माहिती अशी की, शनिवारी १२ नोव्हेंबर रोजी रमेश भामरे यांना अज्ञात वाहनानं धडक दिली होती. या वाहनाच्या धडकेत रमेश भामरे यांचा मृत्यू झाल्याची जायखेडा पोलीस ठाण्यात नोंद करण्यात आली होती. मात्र हा अपघात नसून घातपात असल्याची गोपनीय माहिती पोलिसांना मिळाली. तसेच घटनाक्रम देखील संशयास्पद वाटत असल्याने पोलिसांनी या घटनेचे गांभीर्य लक्षात घेऊन तपास सुरू केला.
काका आणि पुतण्यामध्ये जमिनीवरून वाद असल्याची माहिती पोलिसांना मिळाली होती. पोलिसांनी या अनुषंगाने घटनेचा तपास करण्यास सुरुवात केली असता या प्रकरणाचे एक-एक धागेदोरे मिळू लागले आणि त्यावरून पोलिसांचा संशय खरा ठरला. पिंपळकोठे येथील रहिवासी असलेले शिक्षक रमेश भामरे यांना पुतण्या सुजित भामरे याने जाणीवपूर्वक ट्रॅक्टरने धडक दिल्याचे पोलीस चौकशीत निष्पन्न झाले.
दरम्यान ,रमेश भामरे यांच्या अंत्यसंस्कारावेळी स्थानिक गुन्हे शाखेचे सहा पोलीस कर्मचारी साध्या गणवेशात येऊन पाळत ठेवत होते. पोलिसांनी सुजित भामरे याला ताब्यात घेतल्यानंतर त्यांने सुरुवातीला उडवा उडवीची उत्तरे दिली.
त्यानंतर संशयित सुजितला पोलिसी खाक्या दाखवताच त्याने गुन्हा केल्याचे कबूल केले. सुजित भामरे यांनी भामरे यांच्या दुचाकी ट्रॅक्टरने धडक दिली आणि यात भामरे जखमी झाले. त्यानंतर त्यांच्या डोक्यावर हत्याराच्या सहाय्याने वार करून त्यांना ठार मारले. प्राथमिक शिक्षक रमेश भामरे यांचे अपघाती निधन नसून हत्या करण्यात आल्याची धक्कादायक बाब उघड झाल्याने रमेश भामरे यांच्या कुटुंबाला देखील धक्का बसला असून या घटनेन परिसरात एकच खळबळ उडाली आहे.
