जळगाव : – सध्या महाराष्ट्रात घातपात झाल्याचा घटनांमध्ये दिवसेंदिवस वाढ होत आहे अश्यातच जळगाव जिल्ह्यात गुन्हेगारीचे प्रमाण दिवसेंदिवस वाढत चाललेले आहे. गेल्या आठवड्यात पाचोरा आणि जामनेर तालुक्यात वेगवेगळ्या घटनांमध्ये दोन जणांचा निर्घृण खून झाल्याच्या घटना ताज्या असताना यावल तालुक्यातील किनगाव बुद्रुक येथील एका वाहन चालकाचा गळा चिरून व दगडाचे ठेचून निर्घृण खून केल्याची धक्कादायक घटना शुक्रवारी सकाळी उघडकीला आली आहे. भिमराव शंकर सोनवणे (वय-६० वर्ष, रा. किनगाव बुद्रुक ता. यावल) असे वृद्ध मयत वाहन चालकाचे नाव आहे.
यावल तालुक्यातील किनगाव बुद्रुक येथे भिमराव सोनवणे हे मुलगा व सून यांच्यासोबत वास्तव्याला होते. खासगी वाहन चालवून आपला उदरनिर्वाह करत होते. कामानिमित्ताने घराबाहेर पडलेले भिमराव सोनवणे हे गुरुवारी रात्री घरी परत आले नाहीत. शुक्रवारी सकाळी गावातील शेतमजूर हे शेतात जात असताना गावापासून काही अंतरावर असलेल्या किनगाव चुंचाळे रस्त्यावरील ढोल्या मोह नदीच्या पुलाखाली त्यांना बेपत्ता असलेल्या भिमराव सोनवणे यांचा मृतदेह रक्ताबंबाळ अवस्थेत आढळून आला. मजुरांनी ही माहिती गावात कळविली.
घटनेची माहिती मिळाल्यानंतर फैजपुर विभागाचे उपविभागीय पोलीस अधिकारी डॉ. कुणाल सोनवणे यांच्या मार्गदर्शनाखाली पोलीस निरीक्षक राकेश मानगावकर, पोलीस उपनिरीक्षक प्रदीप बोरूडे, यांच्यासह पोलीस कर्मचाऱ्यांचे पथक हे घटनास्थळी दाखल झाले आहे.
भिमराव सोनवणे यांच्यावर सुरुवातीला मारेकऱ्यांनी गळ्यावर वार केले, त्यानंतर त्यांची दगडाने ठेचून हत्या करण्यात आल्याचे घटनास्थळावरील परिस्थितीवरुन समोर आले आहे. मृतदेहाचा पंचानामा करण्यात आला आहे, तसेच घटनास्थळी श्वानपथकाला पाचारही करण्यात आले होते. शेवटचे वृत्त हाती तोपर्यंत मयत भिमराव सोनवणे यांचा मुलगा विनोद भिमराव सोनवणे यांच्या फिर्यादीवरून यावल पोलीस ठाण्यात गुन्हा नोंदविण्याचे काम सुरू होते.
गावापासून काही अंतरावर भिमराव सोनवणे हे कसे आले, रात्रभर भिमराव सोनवणे यांच्यासोबत काय घडले, त्यांचा एवढ्या निर्घृणपणे खून कोणी व कोणत्या कारणासाठी केला, यासह अनेक प्रश्न उपस्थित होत असून या सर्व प्रश्नांच्या आधारावर पोलीस यंत्रणा कामाला लागली आहे.
दरम्यान रविवारी पहाटे पाचोरा तालुक्यातील वाळू व्यावसायिक तरुणाचा निर्घृणपणे खून करण्यात आला होता, या घटनेला दोन दिवस उलटत नाहीत, तोच बुधवारी जामनेर तालुक्यातील पहूर गावाजवळ एका शेतात दगडाने ठेचून तरुणाचा खून करण्यात आला होता. पाच दिवसातील तीन खुनाच्या घटनांमुळे पोलिसांचा धाक संपला आहे की काय असा सवाल उपस्थित होत आहे तर दुसरीकडे दोन्ही घटना ताज्या असतानाच पुन्हा वाहनचालक वृद्धाचा निर्घृण पद्धतीने खून करण्यात आल्याच्‍या या घटनेने जळगाव जिल्हा हादरला आहे.
हे वाचलंत का ?
- Viral Video:एका कारचालकास रुग्णवाहिकेला रस्ता न देणे पडले महागात, पोलिसांनी शिकवला धडा, लायसन्स केलं रद्द अन् केला लाखो रुपये दंड.
- आक्षेपार्ह पोस्टमुळे धरणगावात तणावपूर्ण बंद; भाजप व शिवेसेनेतर्फे पोलीस निरीक्षकांना निवेदन
- पतीच्या उपचारादरम्यान हृदयविकाराच्या झटक्याने मृत्यूनंतर तीन तासांत पत्नीने संपवली जीवन यात्रा; दोघांचे एकाच चितेवर अंत्यसंस्कार
- सोशल मिडीयावर माळी समाजावरील आक्षेपार्ह मजकुराच्या निषेधार्थ एरंडोल बंद; माजी पालकमंत्री डॉ.सतीश पाटील यांच्या पुतळ्याचे दहन.
- आजचे राशी भविष्य गुरूवार दि.२१ नोहेंबर २०२४
