जळगाव: जळगाव तालुक्यातील पाथरी येथे ११ वर्षीय बालकाला ताप आल्याने गावातील दवाखान्यात नेण्यात आले. चार दिवसात गावातील डॉक्टरांनी बालकाला वेगवेगळ्या दिवशी कमरेवर तब्बल चार वेळा तर एक वेळा हातावर इंजेक्शन दिले. या इंजेक्शनमुळे बालकाच्या कमरेवर सेप्टिक होऊन कमरेपासून ते मांडीपर्यंत गँगरीन झाले होते. त्यावर शस्त्रक्रिया करण्यापूर्वी रक्ताचा नमुना घेत असताना बालकाचा मृत्यू झाला होता. परवानगी नसतानाही डॉक्टरांनी इंजेक्शन दिल्याने तसेच अहवालात डॉक्टरांच्या निष्काळजीपणामुळे बालकाचा मृत्यू झाल्याचे समोर आल्यानंतर याप्रकरणी दीड वर्षांनी गुरुवारी बालकाच्या आईच्या फिर्यादीवरुन पाथरी गावातीलच तिन्ही डॉक्टरांविरोधात एमआयडीसी पोलीस ठाण्यात गुन्हा दाखल करण्यात आला आहे. दुर्वेश नाना पाथरवट असे मयत बालकाचे नाव आहे.

धरणगाव तालुक्यातील वाघळुद येथील दुर्वेश पाथरवट हा पाथरी येथे आईसोबत मामाच्या गावी राहत होता. १० ऑक्टोबर २०२१ रोजी दुर्वेशला ताप आल्याने कुटुंबियांनी त्यास पाथरी गावातीलच डॉ. स्वप्निल युवराज पाटील यांच्या दवाखान्यात नेले होते. त्यांनी तपासून दुर्वेश यास कमरेवर एक इंजेक्शन व काही गोळ्या लिहून दिल्या होत्या. यानंतर तीन दिवसांनी १३ ऑक्टोबरला पुन्हा दुर्वेश यास ताप आल्याने कुटुंबियांनी त्याला डॉ. स्वप्निल पाटील यांच्या दवाखान्यात नेले. याठिकाणी डॉ स्वप्निल पाटील नव्हते, तर डॉ. युवराज जयराम पाटील यांनी दुर्वेश या तपासून दुर्वेश यांच्या दोन्ही कमरेवर इंजेक्शन व गोळ्या लिहून दिल्या होत्या.

१४ ऑक्टोबरला दुर्वेशच्या कमरेवर इंजेक्शन दिल्याच्या ठिकाणी त्रास व्हायला लागल्याने कुटुंबियांनी दुर्वेश यास गावातील डॉ सुभाष जाधव यांच्याकडे नेले. त्यांनी दुर्वेशला त्याच्या कमरेवर व हाताच्या दंडावर इंजेक्शन दिले व काही गोळ्या लिहून दिल्या. दुर्वेशला कमरेवर इंजेक्शन घेतल्याच्या ठिकाणी त्रास होत असल्याने दुर्वेशच्या मामाने डॉ. युवराज पाटील यांना फोनवरुन सांगितले. यानंतर डॉक्टर युवराज पाटील घरी आले. त्यांनी दुर्वेशला तपासले तसेच दवाखान्यात घेऊन या. डॉक्टर स्वप्नील पाटील हे तपासून नेमकं काय झालं ते सांगतील असं युवराज पाटील यांनी दुर्वेशच्या कुटुंबियांना सांगितलं.

इंजेक्शनच्या जागी सेप्टिक होऊन गँगरीन झाल्याचे ऐकताच कुटुंबियांना धक्का

दुर्वेशला दवाखान्यात नेले असता, डॉ स्वप्निल पाटील यांनी दुर्वेश यास तपासून इंजेक्शन दिल्याच्या ठिकाणी सेप्टिक झाले असावे असे सांगत त्यास पुढील उपचारासाठी जळगावातील पियुश हॉस्पिटल येथे घेऊन जाण्याचा सल्ला दिला आणि त्याबाबत चिठ्ठी बनवून देतो असे सांगितले. डॉ स्वप्निल पाटील यांच्या सांगण्यानुसार कुटुंबियांनी १५ ऑक्टोंबर रोजी दुर्वेश यास उपचारासाठी जळगावात पियुश हॉस्पिटल येथे नेले. याठिकाणच्या डॉक्टरांनी दुर्वेश यास तपासले व सोनोग्राफी करण्यास सांगितले.

सोनोग्राफीनंतर दुर्वेश यास कमरेपासून मांडीपर्यंत गँगरीन झाले असून त्याची शस्त्रक्रिया करावी लागेल असे पियुश हॉस्पिटल येथील डॉक्टरांनी सांगितले व दुर्वेशच्या कुटुंबियांनी शस्त्रक्रिया करण्यास होकार दिला. पियुश हॉस्पिटल येथे शस्त्रक्रियेपूर्वी रक्ताचे सॅम्पल घेत असताना दुर्वेशची हालचाल अचानक थांबली. डॉक्टरांनी दुर्वेशची छाती पंपिंग केली. परंतु दुर्वेश हा प्रतिसाद देत नसल्याने डॉक्टरांनी जळगावातील ऑर्किड हॉस्पिटल येथे घेवून जाण्यास सांगितले. तेथे नेल्यावर त्या ठिकाणच्या डॉक्टरांनी जिल्हा रुग्णालयात घेवून जाण्यास सांगितले. जिल्हा रुग्णालयात आणले असता येथील वैद्यकीय अधिकाऱ्यांनी दुर्वेश यास तपासून मयत घोषित केले. याबाबत सुरुवातीला एमआयडीसी पोलीस ठाण्यात अकस्मात मृत्यूची नोंद करण्यात आली होती.

डॉक्टरांचा निष्काळजीपणाचा दुर्वेश ठरला बळी

अकस्मात मृत्यूची नोंद झाल्यानंतर पोलिसांनी मयत दुर्वेश याची आई तसेच मामा व इतर कुटुंबियांचे जाबजबाब नोंदविले. नेमका मृत्यू कसा झाला याचे कारण समोर येण्यासाठी दुर्वेश याचे घेतलेले नमुने नाशिक येथील न्यायवैद्यकीय प्रयोग शाळेत तपासणीकरीता पाठविण्यात आले होते. त्याचा अहवाल प्राप्त झाला. या जिल्हा रुग्णालयातील वैद्यकीय अधीक्षक यांनी अभिप्राय दिला, या अभिप्रायात दुर्वेश यास इंजेक्शन देणारे पाथरी गावातील डॉ स्वप्निल युवराज पाटील, युवराज गंगाराम ऊर्फ जयराम पाटील व डॉ सुभाष जाधव यांना इंजेक्शन देण्याची परवानगी नसतानाही त्यांनी दुर्वेश यास कमरेवरती इंजेक्शन दिले आणि या इंजेक्शनमुळे दुर्वेश यास गँगरीन होवून त्याचा मृत्यू झाला असे नमूद होते. त्यानुसार गुरुवार, २३ मार्चला दुर्वेश याची आई प्रतिभा नाना पाथरवट यांनी एमआयडीसी पोलीस ठाण्यात फिर्याद दिली.

या फिर्यादीनुसार डॉ. स्वप्नील युवराज पाटील, युवराज गंगाराम उर्फ जयराम पाटील आणि डॉ. सुभाष जाधव यांच्याविरोधात निष्काळजीपणामुळे मुलाच्या मृत्यूप्रकरणी गुन्हा दाखल करण्यात आला आहे. पुढील तपास पोलीस उपनिरीक्षक रविंद्र गिरासे करत आहेत.

हे वाचलंत का ?

• Viral Video: दोन दरोडेखोर पिस्तुलाचा धाक दाखवून दागिने लुटणार इतक्यात दुकानदार व कर्मचाऱ्यांनी अस केलं की चोरांचा डाव उलटवला.
• पोलखोल! बनावट एडिशनल एसपी बनून आली पोलीस ठाण्यात पोलिसांनी केलं सॅल्यूट;पण एक छोटीशी चूक होताच पोलिसांनी केला महिलेचा पर्दाफाश.
• एरंडोल येथे संविधान दिवस उत्साहात संपन्न; “घर घर संविधान” चळवळ यशस्वी करण्याचा संकल्प
• धक्कादायक! आईने घरातील पत्र्याला घेतला गळफास,तर दोन चिमुकली आढळली पाण्याच्या बॅरेलमध्ये,कारण अस्पष्ट.
• आजचे राशी भविष्य गुरूवार दि. २८ नोहेंबर २०२४