IPL: डकवर्थ लुईस पद्धतीने पंजाबची कोलकत्यावर सात धावांनी मात, अर्शदीप-भानुका चमकले

By
टीम झुंजार
-
Spread the love

मुंबई (गुरुदत्त वाकदेकर) : आयपीएल २०२३ चा दुसरा सामना पंजाब किंग्ज आणि कोलकता नाईट रायडर्स यांच्यात खेळला गेला. पंजाब संघाने डकवर्थ लुईस पद्धतीने हा सामना सात धावांनी जिंकला. प्रथम फलंदाजी करताना पंजाब किंग्जने २० षटकांत ५ गडी गमावून १९१ धावा केल्या. प्रत्युत्तरात कोलकता संघ १६ षटकांत सात गडी गमावून केवळ १४६ धावाच करू शकला आणि डकवर्थ लुईस पद्धतीने सामना सात धावांनी गमावला. पंजाबकडून भानुका राजपक्षेने सर्वाधिक ५० धावांची खेळी केली. त्याचवेळी कोलकत्याकडून आंद्रे रसेलने सर्वाधिक ३५ धावा केल्या. पंजाबचा संघ आपल्या घरच्या मैदानावर नाणेफेक गमावून प्रथम फलंदाजीला आला. शिखर धवन आणि प्रभसिमरन सिंग यांनी डावाची सुरुवात केली.

प्रभसिमनरने १२ चेंडूत २३ धावा करत संघाला आक्रमक सुरुवात करून दिली. तो बाद झाल्यानंतर शिखर धवन आणि भानुका राजपक्षे यांनी डावाची धुरा सांभाळली. दोघांनी दुसऱ्या विकेटसाठी ८६ धावांची भागीदारी केली. राजपक्षे ३२ चेंडूत ५० धावा करून बाद झाला. मात्र, पंजाबच्या रनरेटमध्ये फरक पडला नाही. जितेश शर्माने ११ चेंडूत २१, सिकंदर रझाने १३ चेंडूत १६ आणि सॅम करणने १७ चेंडूत नाबाद २६ धावा करत आपल्या संघाला सुस्थितीत पोहचवले. २९ चेंडूत ४० धावा केल्यानंतर कर्णधार शिखर धवनही बाद झाला, पण अखेर शाहरुख खानने सात चेंडूत नाबाद ११ धावा करून संघाची धावसंख्या पाच विकेट्सवर १९१ पर्यंत नेली. एकेकाळी पंजाबचा संघ २०० धावांचा टप्पा सहज पार करेल असे वाटत होते, पण राजपक्षेची विकेट पडल्यानंतर संघाची धावगती कमी झाली. कोलकत्याकडून टीम साऊदीने दोन विकेट घेतल्या, पण चार षटकांत ५४ धावा दिल्या. त्याचवेळी उमेश यादव, सुनील नरेन आणि वरुण चक्रवर्ती यांनी प्रत्येकी एक विकेट घेतली. मात्र, संघाच्या तीन गोलंदाजांची सरासरी धावगती १० पेक्षा जास्त होती. फक्त उमेशने ६.८० आणि वरुण चक्रवर्तीने ६.५० च्या इकॉनॉमी रेटने धावा दिल्या.

कोलकत्याचा डाव सुरू होण्यापूर्वी मैदानावरील खांबामध्ये वीजपुरवठा खंडित झाला होता. त्यामुळे जवळपास अर्धा तास सामना थांबवण्यात आला. कोलकत्याचा डाव सुरू असताना पंजाबने ऋषी धवनला इम्पॅक्ट प्लेयर म्हणून मैदानात उतरवले. त्याच वेळी, विकेट पडल्यानंतर, कोलकाताने वेंकटेश अय्यरला आपला प्रभावशाली खेळाडू म्हणून निवडले. खराब सुरुवातीतून कोलकत्याला सावरता आले नाही
१९२ धावांचा पाठलाग करताना कोलकत्याची सुरुवात खूपच खराब झाली. मनदीप सिंग चार चेंडूत दोन धावा करून बाद झाला. यानंतर अनुकुल रॉयनेही पाच चेंडूत चार धावा केल्या. अर्शदीपने एकाच षटकात दोघांनाही बाद करत कोलकत्याला पिछाडीवर आणले. यानंतर कोलकता संघाने वरुण चक्रवर्तीच्या जागी व्यंकटेश अय्यरला त्यांच्या संघातील प्रभावशाली खेळाडू म्हणून घेतले.

व्यंकटेश चौथ्या क्रमांकावर फलंदाजीला आला. मात्र, त्याचे आगमन होताच गुरबाज १६ चेंडूत २२ धावा करून बाद झाला. यानंतर कर्णधार राणाने व्यंकटेशसह डावाची धुरा सांभाळली. दोघांनी चौथ्या विकेटसाठी ४६ धावा जोडल्या. यानंतर नितीश राणाही १७ चेंडूत २४ धावा करून बाद झाला. रिंकू सिंगनेही चार धावा केल्या आणि कोलकता संघ अडचणीत आला. मात्र, आंद्रे रसेलने १९ चेंडूत ३५ धावा करत संघाचे सामन्यात पुनरागमन केले. त्याने व्यंकटेशसोबत सहाव्या विकेटसाठी ५० धावा जोडल्या. कोलकत्याच्या डावाच्या १५व्या षटकात रसेल बाद झाला आणि २८ चेंडूत ३४ धावा काढून पुढील षटकात व्यंकटेशही बाद झाला. कोलकता संघ अडचणीत आला होता, पण शार्दुलने पहिल्याच चेंडूवर षटकार ठोकला. त्याचवेळी नवव्या क्रमांकावर फलंदाजीला आलेल्या नरेनने १६व्या षटकांत दोन चेंडूंत सात धावा काढत संघाला १४६ धावांपर्यंत पोहचवले. आता कोलकत्याला विजयासाठी २४ चेंडूत ४६ धावांची गरज होती, तर त्यांच्या तीन विकेट शिल्लक होत्या. शार्दुल आणि नरेनची जोडी कोलकत्याचा विजय साकार करू शकली असती, पण त्याचवेळी पावसाचा जोर वाढला. यावेळी कोलकता संघ डकवर्थ लुईस पद्धतीनुसार सात धावांनी मागे होता. या सामन्यात पुढे खेळ झाला नाही आणि पंजाबने सात धावांनी सामना जिंकला.

पंजाबकडून अर्शदीप सिंगने सर्वाधिक तीन बळी घेतले. त्यालाच सामनावीर पुरस्काराने गौरविण्यात आले. सॅम करण, नॅथन एलिस, सिकंदर रझा आणि राहुल चहर यांना प्रत्येकी एक विकेट मिळाली.

हे देखील वाचा

टीम झुंजार