मुंबई (गुरुदत्त वाकदेकर) : आयपीएलच्या १६व्या मोसमात रॉयल चॅलेंजर्स बंगलोरने शनिवारी दिल्ली कॅपिटल्सचा २३ धावांनी पराभव केला. बेंगळुरूच्या एम चिन्नास्वामी स्टेडियमवर नाणेफेक गमावल्यानंतर आरसीबीने १७५ धावांचे लक्ष्य ठेवले. प्रत्युत्तरात दिल्लीला निर्धारित २० षटकांत ९ गडी गमावून १५१ धावाच करता आल्या. सलग दोन पराभवानंतर आरसीबीने विजय मिळवला आहे. बंगळुरूचे आता ४ गुण झाले आहेत. त्याचवेळी दिल्लीचा सलग पाचवा पराभव झाला असून ते गुणतक्त्यात तळाशी आहेत.
लक्ष्याचा पाठलाग करताना दिल्लीची खराब सुरुवात झाली. सलामीवीर पृथ्वी शॉ (०) पहिल्याच षटकात धावबाद झाला. मिचेल मार्शचे खातेही उघडले नाही. यश धुलने केवळ एक धाव घेतली. कर्णधार डेव्हिड वॉर्नरने १३ चेंडूत १९ धावा केल्या. अभिषेक पोरेल (५) अप्रतिम कामगिरी करू शकला नाही. दिल्लीने एकूण ५३ धावांवर ५ विकेट गमावल्या होत्या. मात्र, मनीष पांडेने (३८ चेंडूत ५० धावा) दीर्घकाळ फलंदाजी केली. तो सातवा खेळाडू म्हणून तंबूमध्ये परतला. अक्षर पटेल (१४ चेंडूत २१ धावा) आणि अमन खान (१० चेंडूत १८) यांना मोठी खेळी खेळता आली नाही. ललित यादवने ४ धावा जोडल्या. एनरिक नॉर्खियाने १४ चेंडूत नाबाद २३ धावा केल्या. कुलदीप यादवने ६ चेंडूत ७ धावा केल्यानंतर नाबाद राहिला. नवोदित वैशाखने आरसीबीकडून तीन बळी घेतले. मोहम्मद सिराजने २ बळी घेतले.
तत्पूर्वी, बंगळुरूने निर्धारित २० षटकांत ६ गडी गमावून १७४ धावा केल्या. विराट कोहलीने (३४ चेंडूत ५०) संथगतीने अर्धशतक झळकावले. महिपाल लोमरोर (२६), ग्लेन मॅक्सवेल (२४) आणि कर्णधार फाफ डुप्लेसिस (२२) यांनेही महत्त्वाचे योगदान दिले. हर्षल पटेलने ६ धावा केल्या. दिनेश कार्तिक शून्यावर बाद झाला. त्याचवेळी शाहबाज अहमद (नाबाद २०) आणि अनुज रावत (नाबाद १५) यांनी सातव्या विकेटसाठी ४२ धावांची अखंड भागीदारी केली. दिल्लीतर्फे कुलदीप यादव आणि मिचेल मार्श यांनी प्रत्येकी दोन तर अक्षर पटेल आणि ललित यादव यांना प्रत्येकी एक विकेट मिळाली.
विराट कोहलीला सामनावीर पुरस्काराने गौरविण्यात आले.
