मुंबई (गुरुदत्त वाकदेकर) : आयपीएल २०२३ च्या २६ व्या सामन्यात लखनौ सुपर जायंट्सने कमी धावसंख्या असूनही राजस्थान रॉयल्सचा १० धावांनी पराभव केला. नाणेफेक हरल्यानंतर प्रथम फलंदाजी करताना लखनौने २० षटकांत सात गडी गमावून १५४ धावा केल्या. काइल मेयर्सने ४२ चेंडूत ५१ धावांची खेळी केली. तर कर्णधार केएल राहुलने ३९ धावा केल्या.
प्रत्युत्तरात राजस्थानच्या संघाने एक विकेट गमावून ८७ धावा केल्या होत्या. मात्र, त्यानंतर नियमित अंतराने विकेट पडत राहिल्याने संघाला २० षटकांत ६ गडी गमावून केवळ १४४ धावा करता आल्या. यशस्वी जैस्वालने सर्वाधिक ४४ धावा केल्या. त्याचवेळी जोस बटलरने ४० धावांची खेळी केली. लखनौ आयपीएलमध्ये आतापर्यंत एकूण ११ वेळा बचावासाठी मैदानात उतरले आहेत. या संघाने नऊ वेळा विजय मिळवला आहे, तर केवळ दोन सामन्यांत संघाचा पराभव झाला आहे. जयपूरमधील गेल्या सात सामन्यांमध्ये नंतर फलंदाजी करणाऱ्या संघाने सहा सामने जिंकले आहेत. लखनौने प्रथम फलंदाजी करत सामना जिंकला.
आवेश खानने शेवटच्या षटकात दोन बळी घेतले. त्याने तिसऱ्या चेंडूवर देवदत्त पडिक्कल आणि चौथ्या चेंडूवर ध्रुव जुरेलची विकेट घेतली. यापूर्वी त्याने शिमरॉन हेटमायरची विकेटही घेतली होती. आवेशने एकूण तीन विकेट घेतल्या. मात्र, सामनावीराचा पुरस्कार मार्कस स्टॉइनिसला देण्यात आला. त्याने दोन विकेट्स घेतल्या आणि २१ धावा केल्या.
नाणेफेक गमावल्यानंतर प्रथम फलंदाजी करताना केएल राहुल आणि काइल मेयर्स यांनी लखनौला संथ सुरुवात करून दिली. दोघांनी सात षटकांत ४३ धावा जोडल्या होत्या. यानंतर दोघांनी गियर बदलले आणि पुढच्या दोन षटकात ३१ धावा केल्या. मात्र, धावगती वाढवताना कर्णधार राहुल जेसन होल्डरच्या ११व्या षटकात जोस बटलरकडे झेल देऊन बाद झाला. राहुलने ३२ चेंडूत चार चौकार आणि एका षटकाराच्या मदतीने ३९ धावांची खेळी केली. त्याचवेळी आयुष बडोनी एक धाव आणि बर्थडे बॉय दीपक हुडा दोन धावा करून बाद झाला.
आयपीएल २०२३ मध्ये काइल मेयर्सने तिसरे अर्धशतक ठोकले. मात्र, अर्धशतक झळकावल्यानंतर तो लगेचच बाद झाला. अश्विनने १४ व्या षटकात दीपक हुडा आणि मेयर्स या दोघांनाही बाद केले. अश्विनने मेयर्सला त्रिफळाचीत केले. तो ४२ चेंडूंत चार चौकार आणि तीन षटकारांच्या मदतीने ५१ धावा करून बाद झाला. मार्कस स्टॉइनिस १६ चेंडूत २१ धावा करून बाद झाला. त्याचवेळी शेवटच्या षटकात निकोलस पूरन आणि युधवीर सिंग चरक धावबाद झाले. पूरणने २० चेंडूत २८ धावा केल्या आणि युधवीर एक धावा काढून बाद झाला. कृणाल पांड्या चार धावा करून नाबाद राहिला. राजस्थानकडून अश्विनने सर्वाधिक दोन विकेट घेतल्या. त्याचबरोबर ट्रेंट बोल्ट, संदीप शर्मा आणि जेसन होल्डरला प्रत्येकी एक विकेट मिळाली.
१५५ धावांच्या लक्ष्याचा पाठलाग करताना राजस्थानची सुरुवात चांगली झाली. यशस्वी जैस्वाल आणि जोस बटलर यांनी पहिल्या विकेटसाठी ८७ धावांची भागीदारी केली. मात्र, यासाठी ६९ चेंडू खेळले. राजस्थानला पहिला धक्का यशस्वीच्या रूपाने बसला. तो ३५ चेंडूंत चार चौकार आणि दोन षटकारांच्या मदतीने ४४ धावा करून बाद झाला. त्याचवेळी बटलरला ४१ चेंडूत ४० धावा करता आल्या. या खेळीत त्याने ४ चौकार आणि १ षटकार लगावला. दोघांनाही मार्कस स्टॉइनिसने बाद केले. कर्णधार संजू सॅमसन चार चेंडूत दोन धावा करून धावबाद झाला. त्याचवेळी शिमरॉन हेटमायर दोन धावा करून आवेश खानचा बळी ठरला.
देवदत्त पडिक्कल आणि रियान पराग यांनी शेवटच्या काही षटकांत संथ फलंदाजी केली. परिणामी राजस्थानला विजयासाठी शेवटच्या षटकात १९ धावांची गरज होती. मात्र, आवेश खानने अवघ्या आठ धावा दिल्या आणि लखनौने १० धावांनी सामना जिंकला. देवदत्त पडिक्कल २१ चेंडूंत चार चौकारांच्या मदतीने २६ धावा करून बाद झाला. ध्रुव जुरेलला खातेही उघडता आले नाही. आवेशने दोघांनाही बाद केले. रियान पराग १५ धावा आणि अश्विनने तीन धावा केल्यानंतर नाबाद राहिला.
