मुंबई (गुरुदत्त वाकदेकर) : भारताने शनिवारी (१२ ऑगस्ट) टी२० मालिकेतील चौथ्या सामन्यात वेस्ट इंडिजचा नऊ गडी राखून पराभव केला. या विजयासह टीम इंडियाने मालिकेत २-२ अशी बरोबरी साधली आहे. आता पाचवा आणि निर्णायक सामना रविवारी होणार आहे. लॉडरहिल, फ्लोरिडा येथे भारताचा वेस्ट इंडिजविरुद्धचा हा सलग पाचवा विजय आहे. भारताने २०१९ आणि २०२२ मध्ये प्रत्येकी दोन सामने जिंकले. टीम इंडियाने २०१६ मध्ये येथे फक्त एक सामना गमावला होता. मालिकेत एका क्षणी ०-२ ने पिछाडीवर असताना, भारतीय संघाने तिसऱ्या आणि चौथ्या टी२०मध्ये शानदार पुनरागमन करून वेस्ट इंडिजला मालिकेत अजिंक्य आघाडी घेण्यापासून रोखले. आता अंतिम सामना जिंकून मालिका खिशात घालण्याकडे टीम इंडियाचे लक्ष असेल.

नाणेफेक जिंकल्यानंतर वेस्ट इंडिजचा कर्णधार रोव्हमन पॉवेलने प्रथम फलंदाजी करण्याचा निर्णय घेतला. त्यांच्या संघाने २० षटकांत आठ गडी बाद १७८ धावा केल्या. प्रत्युत्तरात टीम इंडियाने १७ षटकांत एक विकेट गमावून १७९ धावा करत सामना जिंकला. यशस्वी जैसवालने ५१ चेंडूत ८४ धावा केल्यानंतर शेवटपर्यंत नाबाद राहिली. तिलक वर्माने पाच चेंडूंत नाबाद सात धावा केल्या. यशस्वीने आपल्या खेळीत ११ चौकार आणि तीन षटकार मारले.

१७९ धावांच्या लक्ष्याचा पाठलाग करताना भारतीय फलंदाजांनी चमकदार कामगिरी केली. यशस्वी जैसवाल आणि शुभमन गिल यांनी पहिल्या विकेटसाठी १६५ धावांची भागीदारी केली. दोघांनी पहिल्यांदाच टी२०मध्ये शतकी भागीदारी केली आहे. भारताला पहिला धक्का शुभमन गिलच्या रूपाने बसला. १६व्या षटकातील तिसऱ्या चेंडूवर रोमॅरियो शेफर्डने गिलला बाद केले. गिल ४७ चेंडूत ७७ धावा करून बाद झाला. त्याने आपल्या खेळीत तीन चौकार आणि पाच षटकार मारले.

तत्पूर्वी, वेस्ट इंडिजचा कर्णधार पॉवेलचा प्रथम फलंदाजी करण्याचा निर्णय डावखुरा वेगवान गोलंदाज अर्शदीप सिंगने चुकीचा ठरवला होता. डावाच्या दुसऱ्या षटकाच्या चौथ्या चेंडूवर त्याने सलामीवीर काइल मेयर्सला (१७) तंबूमध्ये परत पाठवले. चौकाराच्या प्रयत्नात मेयर्सला यष्टिरक्षक संजू सॅमसनने झेलबाद केले. यानंतर विंडीज संघाने तीन धावांत तीन विकेट गमावल्या. पॉवरप्लेच्या शेवटच्या सहाव्या षटकात अर्शदीपने दुसरा सलामीवीर ब्रेंडन किंगला (१८) कुलदीपकडे झेलबाद केले. त्यानंतर सातव्या षटकाच्या पहिल्या चेंडूवर कुलदीपने निकोलस पूरनला बाद करून संघाला मोठी विकेट मिळवून दिली. पूरनला केवळ एकच धाव करता आली. कुलदीपच्या षटकातील हा पहिलाच चेंडू होता. यानंतर त्याने त्याच षटकातील पाचव्या चेंडूवर कॅप्टन पॉवेलला (१) बाद करून विंडीज संघाला चौथा धक्का दिला. चार गडी बाद झाल्यानंतर आलेल्या अनुभवी फलंदाज शाई होपने स्फोटक शिमरॉन हेटमायरसह संघाची धुरा सांभाळली.

दोघांनी पाचव्या विकेटसाठी ४९ धावांची भागीदारी केली. होपचे अर्धशतक हुकले आणि २९ चेंडूत ४५ धावा केल्यानंतर तो युझवेंद्र चहलचा बळी ठरला. रोमारिया शेफर्ड आणि जेसन होल्डर यांनी फलंदाजी केली नाही. शेफर्ड नऊ धावा आणि मुकेश कुमार तीन धावा करून अक्षर पटेलचा बळी ठरला. १२३ धावांच्या धावसंख्येवर सात विकेट पडल्यानंतर हेटमायरला ओडेन स्मिथने साथ दिली. दोघांनी शेवटच्या षटकात झटपट धावा काढल्या आणि ४४ धावांची भागीदारी केली. हेटमायरने ३९ चेंडूत ६१ धावांची धडाकेबाज खेळी खेळली. त्याने तीन चौकार आणि चार षटकार मारले. अर्शदीप सिंगने हेटमायरला तिलक वर्माकरवी झेलबाद केले. स्मिथने १२ चेंडूत १५ तर अकिल हुसेनने दोन चेंडूत पाच धावा केल्या.

भारताकडून या सामन्यात अर्शदीप सिंग आणि कुलदीप यादव यांनी शानदार गोलंदाजी केली. अर्शदीपने तीन विकेट्स आपल्या नावावर केल्या. त्याने वेस्ट इंडिजचे दोन्ही सलामीवीर काइल मेयर्स आणि ब्रेंडन किंग तसेच शिमरॉन हेटमायर यांना बाद केले. अर्शदीपने चार षटकांत ३८ धावा दिल्या. कुलदीप यादवने निकोलस पूरन आणि रोव्हमन पॉवेल या दोन धोकादायक फलंदाजांना तंबूमध्ये परत पाठवताना मधल्या फळीला बांधून ठेवले. त्याने चार षटकात केवळ २६ धावा दिल्या. अक्षर पटेल, युझवेंद्र चहल आणि मुकेश कुमार यांना प्रत्येकी एक यश मिळाले.

यशस्वी जैसवालला सामनावीर पुरस्काराने गौरविण्यात आले.

हे पण वाचा

• एरंडोल विधानसभा मतदारसंघात महायुतीचे उमेदवार अमोलदादा पाटील यांचा एकतर्फी विजय,५६ हजार ३३२ मतांनी दणदणीत विजय.
• Viral Video:एका कारचालकास रुग्णवाहिकेला रस्ता न देणे पडले महागात, पोलिसांनी शिकवला धडा, लायसन्स केलं रद्द अन् केला लाखो रुपये दंड.
• आक्षेपार्ह पोस्टमुळे धरणगावात तणावपूर्ण बंद; भाजप व शिवेसेनेतर्फे पोलीस निरीक्षकांना निवेदन
• पतीच्या उपचारादरम्यान हृदयविकाराच्या झटक्याने मृत्यूनंतर तीन तासांत पत्नीने संपवली जीवन यात्रा; दोघांचे एकाच चितेवर अंत्यसंस्कार
• सोशल मिडीयावर माळी समाजावरील आक्षेपार्ह मजकुराच्या निषेधार्थ एरंडोल बंद; माजी पालकमंत्री डॉ.सतीश पाटील यांच्या पुतळ्याचे दहन.