मुंबई (गुरुदत्त वाकदेकर) : तिसर्‍या टी-२० सामन्यात ऑस्ट्रेलियाने भारताचा पाच गडी राखून पराभव केला आहे. प्रथम फलंदाजी करताना भारताने २० षटकांत ३ गडी गमावून २२२ धावा केल्या. ऋतुराज गायकवाडने ५७ चेंडूत १२३ धावांची खेळी केली. प्रत्युत्तरात ऑस्ट्रेलियाला शेवटच्या पाच षटकांत ७८ धावांची गरज होती, पण त्यांनी ८० धावा करत सामना जिंकला. १५ षटकांनंतर, भारताने तीन विकेट गमावून १४३ धावा केल्या होत्या, तर ऑस्ट्रेलियाने पाच विकेट गमावून १४५ धावा केल्या. मॅथ्यू वेड आणि ग्लेन मॅक्सवेल खेळपट्टीवर होते. दोघांनी शानदार भागीदारी करत आपल्या संघाला विजयापर्यंत नेले.
ऑस्ट्रेलियाच्या विजयात टीम इंडियाच्या खराब क्षेत्ररक्षणाचाही मोठा वाटा आहे. १८व्या षटकात प्रसिध कृष्णाच्या चेंडूवर सूर्यकुमारने मॅथ्यू वेडचा झेल सोडला. त्यावेळी तो सात चेंडूंत पाच धावा करून खेळपट्टीवर होता आणि त्यानंतर त्याने १६ चेंडूंत २८ धावांची नाबाद खेळी खेळली. त्याचवेळी इशान किशनच्या खराब यष्टिरक्षणामुळेही भारताला सामना गमवावा लागला. अक्षर पटेल १९व्या षटकात गोलंदाजी करत होता. त्याच्या चौथ्या चेंडूवर इशान किशनने मॅथ्यू वेडविरुद्ध स्टंपिंगसाठी अपील केले. तिसऱ्या पंचानी रिप्ले पाहिल्यावर इशानने त्याचे हातमोजे विकेटजवळ आणून चेंडू पकडल्याचे दिसले. वेड बाद झाला नाही, पण त्या चेंडूचे रूपांतर नो बॉलमध्ये झाले आणि ऑस्ट्रेलियाला फ्री-हिट मिळाली. फ्री हिटवर वेडने षटकार ठोकला. त्याच षटकातील शेवटच्या चेंडूवर मॅक्सवेलने रिव्हर्स स्वीप करण्याचा प्रयत्न केला. चेंडू त्याच्या बॅटला लागला नाही पण तो नक्कीच इशानच्या हातमोल्याला लागून चौकार गेला. या धावांमुळे सामना भारताच्या हातून निसटला
भारतीय संघाला अखेरच्या षटकात १ धावा वाचवाव्या होत्या. प्रसीध कृष्णा गोलंदाजी करत होता, पण टीम इंडिया ह्या धाव वाचवू शकली नाही. मॅक्सवेल आणि वेडने ९१ धावा करून ऑस्ट्रेलियाला विजयापर्यंत नेले. शेवटच्या षटकाच्या पहिल्या चेंडूवर वेडने चौकार मारला. त्यानंतर दुसऱ्या चेंडूवर एक धाव आली. यानंतर मॅक्सवेलने तिसऱ्या चेंडूवर षटकार ठोकला. त्यानंतर चौथ्या चेंडूवर चौकार मारला. मॅक्सवेलने पाचव्या चेंडूवर चौकार मारून टी-२० आंतरराष्ट्रीय क्रिकेटमधील चौथे शतक पूर्ण केले. त्याने ४७ चेंडूत शतक झळकावले.
शेवटच्या चेंडूवर ऑस्ट्रेलियाला दोन धावांची गरज होती आणि मॅक्सवेलने चौकार मारून संघाला विजय मिळवून दिला. मॅक्सवेलने ४८ चेंडूत १०४ धावा केल्यानंतर नाबाद राहिला. त्याचवेळी, मॅथ्यू वेडने १६ चेंडूत २८ धावा केल्यानंतर नाबाद राहिला. मॅक्सवेल आता रोहित शर्मासह टी-२० आंतरराष्ट्रीय क्रिकेटमध्ये सर्वाधिक शतके करणारा फलंदाज बनला आहे. या विजयासह ऑस्ट्रेलियाने पाच सामन्यांच्या टी-२० मालिकेत पुनरागमन केले आहे. मालिकेत भारत अजूनही २-१ ने आघाडीवर आहे. या मालिकेतील चौथा सामना रायपूरमध्ये १ डिसेंबरला होणार आहे.
नाणेफेक हरल्यानंतर प्रथम फलंदाजीला आलेल्या टीम इंडियाने २० षटकांत ३ गडी गमावून २२२ धावा केल्या. ऋतुराज गायकवाडने ५७ चेंडूत १२३ धावांची नाबाद खेळी केली. याशिवाय तिलक वर्मा २४ चेंडूत धावा करून नाबाद राहिला. चौथ्या विकेटसाठी दोघांमध्ये ५९ चेंडूत १४१ धावांची नाबाद भागीदारी झाली. ऑस्ट्रेलियाने २० व्या षटकात ग्लेन मॅक्सवेलला गोलंदाजीसाठी पाचारण केले. २० वे षटक मॅक्‍सवेलचे पहिले षटक होते आणि या षटकात ऋतुराजने तीन षटकार आणि एक चौकार मारला. भारताने २०व्या षटकात ३० धावा केल्या. टीम इंडियाने शेवटच्या पाच षटकात ७९ धावा केल्या. टी-२० मध्ये एका षटकात सर्वाधिक धावा देणारा मॅक्सवेल ऑस्ट्रेलियाचा सर्वात महागडा गोलंदाज ठरला. त्याने २००९ मध्ये वेस्ट इंडिजविरुद्ध एका षटकात २७ धावा देणाऱ्या ब्रेट लीचा विक्रम मोडला.
भारताकडून टी-२० मध्ये शतक झळकावणारा ऋतुराज आठवा भारतीय ठरला. त्याच्या आधी रोहित शर्मा, केएल राहुल, सूर्यकुमार यादव, शुभमन गिल, विराट कोहली, दीपक हुडा आणि सुरेश रैना यांनी ही कामगिरी केली आहे. त्याचवेळी ऑस्ट्रेलियाविरुद्ध टी-२०मध्ये शतक झळकावणारा ऋतुराज पहिला भारतीय ठरला. ऋतुराजने आपल्या खेळीत १३ चौकार आणि सात षटकार मारले. ऋतुराजची ही खेळी भारताची टी-२० मधील दुसरी सर्वोच्च खेळी होती. या यादीत शुभमन पहिल्या क्रमांकावर आहे. त्याने यावर्षी अहमदाबादमध्ये न्यूझीलंडविरुद्ध नाबाद १२६ धावा केल्या होत्या. त्याचवेळी तिलकने आपल्या डावात चार चौकार मारले.
त्याआधी यशस्वी जैस्वाल सहा धावा करून बाद झाला तर इशान किशन खाते न उघडता बाद झाला. यानंतर कर्णधार सूर्यकुमार यादवने ऋतुराजसोबत तिसऱ्या विकेटसाठी ५७ धावांची भागीदारी केली. सूर्या २९ चेंडूंत पाच चौकार आणि दोन षटकारांच्या मदतीने ३९ धावा करून बाद झाला. ऑस्ट्रेलियाकडून केन रिचर्डसन, अॅरॉन हार्डी आणि जेसन बेहरेनडॉर्फ यांनी प्रत्येकी एक विकेट घेतली.
मालिकेत पुनरागमन करण्यासाठी ऑस्ट्रेलियाला २२३ धावा करायच्या होत्या. पाठलाग करताना ऑस्ट्रेलियाने शानदार सुरुवात केली. ट्रॅव्हिस हेड आणि अॅरॉन हार्डीने चार षटकांत ४६ धावा केल्या होत्या. कांगारूंना पहिला धक्का पाचव्या षटकात हार्डीच्या (१६) रूपाने बसला. यानंतर सहाव्या षटकात आवेश खानने ट्रॅव्हिस हेडला झेलबाद केले. त्याला १८ चेंडूत ८ चौकारांच्या मदतीने ३५ धावा करता आल्या. यानंतर रवी बिश्नोईने जोश इंग्लिसला त्रिफळाचीत केले. त्याला १० धावा करता आल्या. त्यानंतर मॅक्सवेलने मार्कस स्टॉइनिससोबत ६० धावांची भागीदारी केली. स्टॉइनिसला अक्षरने बाद केले. त्याला २१ चेंडूत १७ धावा करता आल्या. त्यानंतर बिश्नोईने टीम डेव्हिडला (०) बाद करून सामन्यातील भारताची पकड मजबूत केली. मात्र, त्यानंतर मॅक्सवेल शो पाहायला मिळाला. १४ षटकांत ऑस्ट्रेलियाची धावसंख्या पाच गड्यांच्या मोबदल्यात १३६ धावा होती आणि लक्ष्य गाठणे अशक्य वाटत होते.
मात्र, मॅक्सवेलच्या बॅटची जादू त्याने विश्वचषकादरम्यान अफगाणिस्तानविरुद्ध दाखवली होती. तो एका टोकाकडून धावा काढत राहिला आणि चौकार आणि षटकार मारत राहिला. त्याने ४८ चेंडूंत आठ चौकार आणि आठ षटकारांच्या मदतीने नाबाद १०४ धावांची खेळी केली. वेडने १६ चेंडूंत तीन चौकार आणि एका षटकाराच्या मदतीने २८ धावांची नाबाद खेळी खेळली. भारताकडून रवी बिश्नोईने सर्वाधिक दोन बळी घेतले. तर अर्शदीप, आवेश आणि अक्षर यांना प्रत्येकी एक विकेट मिळाली. प्रसिधने चार षटकात ६८ धावा दिल्या आणि तो सर्वात महागडा भारतीय गोलंदाज ठरला. मॅक्सवेल आंतरराष्ट्रीय टी-२० मध्ये पाठलाग करताना सर्वाधिक शतके झळकावणारा फलंदाज ठरला. त्याच्या नावे तीन शतके आहेत. या बाबतीत मॅक्सवेलने बाबरला (दोन शतके) मागे टाकले.
मॅक्सवेल आणि वेड यांनी सहाव्या विकेटसाठी नाबाद ९१ धावांची भागीदारी केली. टी-२० मध्ये धावांचा पाठलाग करताना सहाव्या किंवा खालच्या विकेटसाठी ही दुसरी सर्वोच्च भागीदारी आहे. मॅक्सवेलने ४७ चेंडूत शतक झळकावले, जे ऑस्ट्रेलियासाठी आंतरराष्ट्रीय टी-२० मधील सर्वात जलद शतक आहे. या बाबतीत त्याने अॅरॉन फिंच आणि जोश इंग्लिसची बरोबरी केली. त्याचवेळी, मॅक्सवेल आता रोहितसह टी-२० आंतरराष्ट्रीय क्रिकेटमध्ये सर्वाधिक शतके करणारा फलंदाज बनला आहे. या सामन्यात एकूण ४४७ धावा झाल्या, जे कोणत्याही टी-२० आंतरराष्ट्रीय सामन्यातील चौथ्या क्रमांकाची सर्वोच्च धावसंख्या आहे. ऑस्ट्रेलियाविरुद्ध मायदेशात झालेल्या सहा सामन्यांत भारत बचावासाठी उतरला असून पाच सामन्यांत पराभव पत्करावा लागला आहे. भारताने फक्त एकच सामना वाचवला आहे. भारताविरुद्ध कोणत्याही संघाचा हा सर्वात मोठा पाठलाग आहे. यापूर्वी दक्षिण आफ्रिकेने २०२२ मध्ये भारताविरुद्ध २१२ धावांचा यशस्वीपणे पाठलाग केला होता.
हे पण वाचा
- Viral Video:एका कारचालकास रुग्णवाहिकेला रस्ता न देणे पडले महागात, पोलिसांनी शिकवला धडा, लायसन्स केलं रद्द अन् केला लाखो रुपये दंड.
- आक्षेपार्ह पोस्टमुळे धरणगावात तणावपूर्ण बंद; भाजप व शिवेसेनेतर्फे पोलीस निरीक्षकांना निवेदन
- पतीच्या उपचारादरम्यान हृदयविकाराच्या झटक्याने मृत्यूनंतर तीन तासांत पत्नीने संपवली जीवन यात्रा; दोघांचे एकाच चितेवर अंत्यसंस्कार
- सोशल मिडीयावर माळी समाजावरील आक्षेपार्ह मजकुराच्या निषेधार्थ एरंडोल बंद; माजी पालकमंत्री डॉ.सतीश पाटील यांच्या पुतळ्याचे दहन.
- आजचे राशी भविष्य गुरूवार दि.२१ नोहेंबर २०२४
