एरंडोल :- भरधाव वेगाने जाणा-या कारने रस्ता ओलांडत असलेल्या व्यक्तीस जोरदार धडक दिल्यामुळे झालेल्या अपघातात त्याचा उपचार सुरु असतांना मृत्यू झाल्याची घटना काल दुपारी घडली.याबाबत माहिती अशी की,काल दुपारी अडीच वाजेच्या सुमारास सुनील भिमसिंग पाटील (वय-४८) रा.सावखेडा होळ ता.पारोळा हे नवीन बसस्थानका समोर असलेल्या हिमालय पेट्रोल पंपासमोरून रस्ता ओलांडत होते.त्याचवेळी भरधाव वेगाने येणा-या कार क्रमांक एमएच १२ युव्ही ७३२७ ने त्यांना जोरदार धडक
दिल्यामुळे त्यांना डोक्याला व हाताला मार लागला होता.गंभीर जखमी अवस्थेत असलेल्या सुनील पाटील यांनी त्यांचे मामेभाऊ बापू अर्जुन पाटील यांना अपघात झाल्याची माहिती मोबाईलवरून दिली.बापू पाटील हे त्वरित अपघातस्थळी पोहोचले व त्यांनी सुनील पाटील यांना कल्पना हॉस्पिटल येथे उपचारासाठी दाखल केले.उपचार सुरु असतांना त्यांचा मृत्यू झाला.अपघातानंतर कारचालक कार तेथेच सोडून फरार झाला.याबाबत बापू अर्जुन पाटील यांनी दिलेल्या तक्रारीवरून कारचालकाविरोधात गुन्हा दाखल करण्यात आला असून पोलीस निरीक्षक सतीश गोराडे यांचे मार्गदर्शनाखाली हवालदार किरण पाटील तपास करीत आहेत. दरम्यान पघातस्थळ परिसरात यापूर्वी देखील अनेक अपघात झाले असून निष्पाप नागरिकांचे बळी गेले आहेत.
