जळगाव :- मुक्ताईनगरमध्ये एक अत्यंत धक्कादायक प्रकार समोर आला आहे. केंद्रीय राज्यमंत्री रक्षा खडसे यांच्या मुलीची छेड काढणाऱ्या विरोधात मुक्ताईनगर पोलिसांनी अखेर “पोक्सो” कायद्यांतर्गत गुन्हे दाखल केला आहे.केंद्रीय मंत्र्याची मुलगीच सुरक्षित नसेल तर इतरांचं काय असा सवाल या प्रकरणानंतर उपस्थित केला जात आहे.
पोलीस स्टेशनबाहेर मोठा जमाव
केंद्रीय मंत्री रक्षा खडसे यांच्या मुलीबरोबरच इतर मुलींची टवळखोर मुलांकडून यात्रेत छेड काढण्यात आल्याची घटना समोर आली आहे. हा प्रकार समजल्यानंतर केंद्रीय रक्षा मंत्री रक्षा खडसे या स्वत: मुली आणि महिलांना घेऊन पोलीस स्टेशनमध्ये दाखल झाल्या. त्यांनी दोषींवर कारवाई करण्यासाठी आक्रमक पवित्रा घेतल्याचं दिसून आलं. एका केंद्रीय मंत्र्याच्या मुलीची छेड काढल्याप्रकरणी मुक्ताईनगर पोलीस स्टेशनमध्ये नागरिकांसह कार्यकर्त्यांनी मोठा जमाव गोळा झाला आहे. या प्रकरणामुळे राज्यातील महिलांच्या सुरक्षेचा प्रश्न पुन्हा ऐरणीवर आला आहे. आमच्यासारख्या परिवाराच्या मुलीच जर सुरक्षित नसतील तर बाकीच्यांचं काय? असा सवाल रक्षा खडसेंनी पोलिसांना विचारल्याची प्राथमिक माहिती समोर येत आहे. आरोपींना लवकरात लवकर अटक करावी अशी मागणी रक्षा खडसेंनी केली आहे.
तक्रार दाखल केल्यानंतर रक्षा खडसे काय म्हणाल्या?
“आमच्या येथे संत मुक्ताईची यात्रा असते दरवर्षी महाशिवरात्रीला. परवा रात्री माझी मुलगी या यात्रेमध्ये गेली होती. काही मुलांनी तिची छेड काढली. मी माझ्या मुलीला घेऊन पोलीस स्टेशनमध्ये तक्रार करण्यासाठी आली आहे,” असं रक्षा खडसे पोलीस स्टेशनमध्ये तक्रार दाखल करुन बाहेर पडल्यानंतर पत्रकारांशी संवाद साधताना म्हणाल्या.
एकनाथ खडसेंनी सांगितलं नेमकं काय घडलं
दरम्यान, या सर्व प्रकरणावर माजी मंत्री एकनाथ खडसेंनी, बोलताना संताप व्यक्त केला आहे. “वस्तूस्थिती आहे की महिलांनी सुरक्षेसंदर्भात काळजी घेण्याची गरज आहे. या मुलांसंदर्भातील तक्रारी या आधीच पोलिसांकडे गेलेल्या आहेत. टवाळखोर पोरं सराईत गुन्हेगार आहेत. यांच्यावर आधीच गुन्हे दाखल आहेत. चार पाच मुलींचे व्हिडीओ काढले वगैरे प्रकार घडलेत. राज्यभरात महिलांविरोधातील गुन्ह्यांचं प्रमाण वाढलेलं आहे. आरोपींमध्ये कायद्याचा धाक राहिलेला नाही. अनेकदा मुली पुढे येत नाहीत. मात्र आपणच पुढे आलं पाहिजे. म्हणूनच ती तक्रार करण्यासाठी गेली आहे. आपल्या मुलीचं नाव येऊ नये असं पालकांना वाटतं. अखेर नाइल झाल्याने त्यांना आज तक्रार करण्यासाठी जावं लागलं,” असं एकनाथ खडसेंनी सांगितलं.पोलिसांना मारहाण करण्यात आली
“घटना दोन दिवसांपूर्वी घडली. डीएसपीबरोबर मी स्वत: बोललो, एआयजींबरोबर बोललो. रश्मी शुक्लांशी बोललो. पोलीस स्टेशनला गेल्यानंतर दोन तास बसवलं गेलं. मुलींचा विषय आहे विचार करा असं सांगण्यात आलं. त्याने पोलिसांना मारहाण केली. तो पोलिसांना मारहाण करेपर्यंत प्रकरण गेलं. त्याला जामीन मिळाला. या लोकांना राजकीय संरक्षण असल्याने त्यांना काहीच होत नाही. घटना घडल्यानंतर चर्चा होतात. पण घटना होऊ नये याची काळजी घेणं गरजेचं आहे,” असं एकनाथ खडसेंनी म्हटलं आहे.
पोलिसांनी या प्रकरणी बाल लैंगिक अत्याचार संरक्षण कायदा (POCSO) आणि माहिती तंत्रज्ञान (IT) कायद्यांतर्गत गुन्हा दाखल केला आहे.”आम्ही पाठलाग आणि छेडछाडीचे गुन्हे दाखल केले आहेत, तसेच POCSO कायदा आणि IT कायद्यांतर्गतही आरोप लावण्यात आले आहेत.संशयितांना पकडण्यासाठी तीन पोलीस पथके तयार करण्यात आली आहेत,” असे SDPO यांनी पुढे सांगितले.
