नांदेड :- हदगाव तालुक्यातील तामसा पोलीस ठाण्याच्या हद्दीत अनैतिक संबंधातून अल्पवयीन मुलगी गर्भवती राहिल्याचा धक्कादायक प्रकार समोर आला आहे. दरम्यान, प्रसूती झाल्यानंतर प्रकरण दाबण्यासाठी नवजात बाळाला विकण्यात आल्याची माहिती समोर आली आहे.गेल्या महिन्यात नांदेड शहरातील शासकीय रुग्णालयात अल्पवयीन मुलीची प्रसूती झाली असून तिने मुलीला जन्म दिला होता. वर्षभरापूर्वी आरोपी बाबुराव तुपेकर याने गावातील १६ वर्षीय मुलीवर पाण्यात गुंगीचे औषध देऊन अत्याचार केले होते. त्यानंतर सातत्याने आरोपी तरुणीवर अत्याचार करत असल्याची धक्कादायक माहिती समोर आली आहे.
या घटने प्रकरणी पोलिसांनी उपसरपंच असलेल्या बाबुराव तुपेकर (५५) ला अटक केली आहे. आरोपी सातत्याने तरुणीवर लैंगिक अत्याचार करत होता. अशी तक्रार पीडित मुलीने जबाबात म्हंटले आहे. तरुणीने दिलेल्या जबाबानंतर तामसा पोलिसांनी कारवाई करत उपसरपंचाविरोधात पॉक्सो अंतर्गत गुन्हा दाखल केला आहे. गावचा उपसरपंच असल्यामुळे गावात बदनामी होऊ नये म्हणून आरोपीने नवजात मुलीला विकल्याची धक्कादायक माहिती समोर आली आहे. या खळबळजनक घटनेचा पोलीस अधिक तपास करीत आहेत.
