छत्रपती संभाजीनगर :- येथून एक धक्कादायक बातमी समोर आली आहे. या ठिकाणी चुतल बहिणीच्या वाढदिवसाला गेलेल्या एका 3 वर्षांच्या चिमुकल्याचा दुर्दैवी मृत्यू झाला आहे.गरम वरणाच्या पातेल्यात पडून या चिमुकल्याचा मृत्यू झाला. संभाजीनगरच्या वाळूज परिसरात ही घटना घडली आहे. या घटनेमुळे परिसरात हळहळ व्यक्त केली जात आहे.
याबाबत वाळूज पोलिसांकडून मिळालेल्या माहितीनुसार, वंश योगेश हरकळ (3 वर्षे) असं या मृत चिमुकल्याचं नाव आहे. दरम्यान, तो त्याच्या चुलत बहिणीच्या वाढदिवसासाठी पालकांसह छत्रपती संभाजीनगरातील वाळूज परिसरात गेला होता. या ठिकाणी त्यांना वाढदिवस आणि जेवणाचे निमंत्रण होते. मात्र, हा कार्यक्रम वंशसाठी शेवटचा ठरला. या ठिकाणी वाढदिवसानिमित्त आलेल्या पाहुण्यासाठी तयार करण्यात आलेल्या गरम वरणाच्या पातेल्यात पडून वंशचा मृत्यू झाला.
असा घडला आपघात
धक्कादायक असा हा प्रकार छत्रपती संभाजीनगरच्या वाळूज परिसरात घडला. दरम्यान मयत वंश हा त्याच्या चुलत बहिणीच्या वाढदिवसाच्या कार्यक्रमाला गेला असता तो तिथं खेळू लागला. खेळत असताना तो घरातील पलंगावर चढण्याचा प्रयत्न करत होता. तो पलंगाजवळ ठेवलेल्या गरम वरणाच्या पातेल्यावर पाय ठेवून पलंगावर चढण्याचा प्रयत्न करत असताना पातेल्यावरील झाकण सरकले आणि वंश थेट त्या पातेल्यात पडला. पातेल्यातील वरण हे गरम असल्याने वंश गंभीररित्या भाजला गेला. त्याला तात्काळ उपचारासाठी रुग्णालयात दाखल करण्यात आले. मात्र,उपचार सुरु असताना वंशची प्राणज्योत मालावली. दरम्यान धक्कादयक अशा या घटनेमुळे सर्वत्र हळहळ व्यक्त करण्यात येत आहे. या घटनेप्रकरणी वाळूज पोलिस स्टेशनला अकास्मात मृत्यूची नोंद करण्यात आली आहे.
