बंगळुरु :- आसाममधील एका व्लॉगरची तिच्या बॉयफ्रेंडने हत्या केल्याची धक्कादायक घटना समोर आली आहे. प्राथमिक तपासात असं दिसून आलं आहे की, मारेकऱ्याने माया गोगोईच्या मृतदेहासोबत बंगळुरूमधील सर्व्हिस अपार्टमेंटमध्ये दोन दिवस घालवले होते.तो मृतदेहासोबतच राहत होता. या घटनेने एकच खळबळ उडाली आहे.
नेमकी कुठे घडली ही घटना?
एका मुलीचा मृतदेह मिळण्याची ही घटना बंगळुरुमध्ये घडली आहे. या मुलीचं नाव माया गोगोई रेखा असं आहे. तिचा मृतदेह बंगळुरु येथील हॉटेलमध्ये काम करणाऱ्या हाऊसकिपिंग कर्मचाऱ्याने आधी पाहिला. त्यानंतर पोलिसांना याबाबत कळवण्यात आलं. पोलीस मायाचा मित्र आरव हनॉयचा शोध घेत आहेत. बंगळुरुतील इंदिरा नगर भागात असलेल्या हॉटेल रॉयल लिव्हिंग या ठिकाणी ही घटना घडली आहे. पोलिसांनी दिलेल्या माहितीनुसार २३ नोव्हेंबरला दुपारी १२.३० वाजता या दोघांनी हॉटेलमध्ये चेक इन केलं होतं. यानंतर आज सकाळी ८.३० वाजता आरव हॉटेलच्या बाहेर गेल्याचं सीसीटीव्ही फुटेजमध्ये दिसतं आहे. पोलीस उपायुक्त डी. देवराज यांनी ही माहिती दिली आहे. इंडियन एक्स्प्रेसने हे वृत्त दिलं आहे.
पोलीस उपायुक्त देवराज यांनी काय सांगितलंं?
देवराज यांनी दिलेल्या माहितीनुसार आरव हनॉय हॉटेलमध्ये येतानाच सुरा बरोबर घेऊन आला होता. तसंच त्याने झेप्टो या अॅपवरुन एक नायलॉनची दोरी मागवली होती. आमचा प्राथमिक अंदाज असा आहे की आरव हा माया गोगोई रेखाची हत्या करण्याच्या उद्देशानेच तिला या ठिकाणी घेऊन आला होता.
माया गोगोई रेखाच्या अंगावर अनेक वार
माया गोगोई रेखाच्या मृतदेहावर अनेक वार आहेत. तिचा मृत्यू छातीत भोसकल्याने झाला आहे तसंच तिच्या डोक्यावरही वार करण्यात आले आहेत. या प्रकरणात पहिला संशय तिचा मित्र आरव हनॉयवरच आहे. त्याने २४ किंवा २५ नोव्हेंबरला तिची हत्या केली असावी असा अंदाज आहे. मृतदेह शवविच्छेदनासाठी पाठवण्यात आला आहे. त्यानंतर मृत्यू कधी झाला ती वेळ सांगता येईल असंही पोलिसांनी म्हटलं आहे. माया गोगोई रेखा तिच्या बहिणीसह पेईंग गेस्ट म्हणून हुडी या ठिकाणी राहात होती. आरव हनॉय हा तिच्या संपर्कात मागच्या काही महिन्यांपासून आला होता. आरव एका खासगी कंपनीत काम करतो असंही माया गोगोई रेखाच्या बहिणीने सांगितलं आहे. आरव हनॉयचा फोन स्विच ऑफ आहे मात्र आम्ही त्याचा शोध घेत आहोत असं पोलीस उपायुक्त देवराज यांनी सांगितलं. आता या प्रकरणात पुढे काय घडतं ते पाहणं महतत्वाचं असणार आहे.
