नातेवाईकांचा कार्यक्रम जीवावर बेतला;
बीड : बीडच्या अंबाजोगाईमध्ये ट्रक आणि जीपची समोरासमोर धडक होऊन भीषण अपघात झाल्याची धक्कादायक घटना घडली आहे. हा अपघात एवढा भीषण होता की,यात सहा प्रवासी जागीच ठार झाले असल्याचे सांगण्यात येत आहे. हा अपघात अंबाजोगाई तालुक्यातील सायगावच्या खडी केंद्राजवळ घडला आहे. अपघातात मृतांचा आकडा आणखी वाढण्याचा अंदाज व्यक्त करण्यात येत आहे.
आर्वी (ता.लातूर) येथून अंबाजोगाई तालुक्यातील राडी येथे एका घरगुती कार्यक्रमासाठी नातेवाईक जीपने येत होते. दरम्यान, सायगाव जवळील खडी केंद्राजवळ समोरून भरधाव वेगात आलेल्या ट्रकने जीपला जोराची धडक दिली. यात पाच महिला व एक बालक जागीच ठार झाले आहेत. अपघाताची माहिती मिळताच पोलिसांनी घटनास्थळी धाव घेतली असून मृतदेह व जखमींना अंबाजोगाई येथील रुग्णालयात पाठविण्यात आले आहे.
शनिवारी सकाळी दहा वाजेच्या सुमारास हा अपघात झाल्याची माहिती समोर आली आहे. एमएच २४ व्ही – ८०६१ क्रमांकाच्या ट्रकने आरजे ११ जीए ९२१० क्रमांकाच्या जीपला जोरात धडक दिली. जीपमधील प्रवासी लातूरचे रहिवारी असल्याची देखील प्राथमिक माहिती मिळत आहे.
