मुंबई : शरद पवार यांच्या घरावरील हल्ल्याला दोषी ठरवून मुंबई पोलिसांनी वकील गुणरत्न सदावर्ते यांना अटक केली होती. अखेर आज जामीन मिळाल्यानंतर सदावर्ते १८ दिवसानंतर कारागृहाबाहेर आले. कारागृहाबाहेर आल्यानंतर तिथे घालवलेल्या दिवसांबद्दल त्यांनी प्रसारमाध्यांना खास त्यांच्या स्टाईलमध्ये माहिती दिली. ‘जेलमध्ये १८ दिवस फक्त पाणी प्यायलो, जेलमध्ये अनेकांना योगा शिकवला, तसंच हृदयविकाराचा झटका आलेल्या एका पोलीस शिपायाचा जीव वाचवला. तुरुंगातही अशी अनेक चांगली कामे केली’, असं सदावर्ते यांनी सांगितलं.
शरद पवार यांच्या मुंबईतील सिल्व्हर ओक बंगल्यावर झालेल्या हल्ल्याप्रकरणी वकील गुणरत्न सदावर्ते यांना अटक करण्यात आली होती. आज अखेर १८ दिवसांनंतर सदावर्ते तुरुंगाबाहेर आले आहेत. संध्याकाळी साडे सात वाजण्याच्या सुमारास ते ऑर्थर रोड कारागृहातून बाहेर आले. कारागृहातून बाहेर पडताच त्यांचा तोच जुना पुराना अंदाज दिसून आला. जेलमधील १८ दिवसांचा अनुभव त्यांनी प्रसारमाध्यमांपुढे कथन केला.
१८ दिवस फक्त पाणी प्यायलो, जेलमध्ये योगा शिकवला, पोलीस शिपायाचा जीव वाचवला
“कितीही मुस्कटदाबी केली तरी हिंदुस्तानी त्यांच्या ध्येयापासून कधीही मागे हटत नाहीत. १३ वर्षांच्या झेन सदावर्ते (सदावर्तेंची मुलगी) हिने आतापर्यंच्या न्यायालयीन प्रकरणातील मुद्दे काढून देण्याचं काम केलंय. १८ दिवस कसे गेले हे सांगायचं झालं तर, मी तुरुंगात केवळ पाणी प्यायलो. ज्यावेळी मी पहिल्यांदा पोलीस कस्टडीमध्ये होतो, तिथे एका पोलीस शिपायाचा मी जीव वाचवू शकलो. त्या शिपायाला हृदयविकाराचा धक्का आला होता. कोणत्याही फौजदाराला फर्स्ट एड माहित नव्हतं, तेव्हा मला लॉकअपमधून काढलं आणि मी त्या शिपायाचा जीव वाचवला. त्याच प्रकारे मी ज्या ज्या तुरुंगात गेलो तिथे मी योगाचं शिक्षण दिलं, अध्यात्मिक भाषणं केली. तुम्ही कुठेही जा पण तुम्ही चांगलं करु शकता, हे मी १८ दिवसांत अनुभवलं आहे”.
शेवटच्या श्वासापर्यंत लढत राहिन
“मी ठरवलं होतं की, सरकारला जे करायचंय ते करु दे, आपण आपलं तत्व सोडायचं नाही. मी चिंतन केलं. तुरुंगात गेलो त्यादिवसापासून ते आजपर्यंत मी फक्त पाणी प्राशन केलंय. तरी हा कष्टकऱ्यांचा आवाज आहे तसा शाबूत आहे. तुमच्या रक्तात खोट नसेल तर तुम्हाला कोणी पराभूत करु शकत नाही. येणाऱ्या काळात मी कष्टकऱ्यांसाठी नेहमी लढत राहिल. हे माझ्या कुटुंबाचं वचन आहे, जीव गेला तरी हे वचन मोडणार नाही”
एसची कर्मचाऱ्यांना मी कामावर जा सांगितलं, म्हणून ते गेले…
“जे एसटी कर्मचारी कामावर परत गेले ते कोणाच्या सांगण्यावरुन गेले नाहीत. तर गुणरत्न सदावर्तेंनी जेलमधून सांगितलं होतं त्यांना की तुम्ही तुर्तास कामावर जा. कारण सहा महिने माझे कष्टकरी दुखवट्यात होते. त्यांचं मी कोणतच नुकसान होऊ दिलं नाही.”
माध्यमांनी मला साथ दिली
“मी जिथे जिथे जेलमध्ये गेलो तिथे तिथे पत्रकार माझ्या सोबत होते. माझी हत्या होऊ शकली असती पण गाड्यांमागे तुम्ही गाड्या लावल्या. ज्याप्रकारे माझी लीगल टीम होती, त्याचप्रकारे माध्यमांनीही मला साथ दिली”.
