जळगाव : जळगावमध्ये अत्यंत घृणास्पद घटना समोर आली आहे. येथे एका पुजाऱ्याने मंदिरात दर्शनासाठी आलेल्या महिलेचा विनयभंग केल्याप्रकरणी पुजाऱ्यावर गुन्हा दाखल करण्यात आला आहे. राम बालकदास महाराज असे गुन्हा दाखल झालेल्या पुजाऱ्याचे नाव आहे.
पीडीत महिलेने पोलिसात दिलेल्या तक्रारीनुसार असे की, शहरातील शाहूनगरातील तपस्वी हनुमान मंदिरात विवाहित महिला तिच्या जावेसोबत पूजेसाठी आली होती. यावेळी तिची जाऊ पुजा करुन मंदिराच्या बाहेर थांबली.
महिला मंदिरात एकटी असताना पुजारी राम बालकदास महाराज हा महिलेजवळ आला. त्याने तिला सिताराम म्हणण्यास सांगितले. महिला त्याकडे दुर्लक्ष करत बाहेर पडत असतांना पुजाऱ्याने महिलेचा हात धरला आणि तिचा विनयभंग केला. त्यानंतर महिला आरडाओरड करत मंदिराबाहेर पडली. तिने तिच्यासोबत घडलेली हकीकत मंदिराबाहेर उभ्या तिच्या जावेला, तसेच घरी आल्यावर पतीला सांगितली. मंगळवारी पुजारी राम बालकदास महाराज यांच्या विरोधात शहर पोलिसात तक्रार करण्यात आली आहे. त्यावरून पुजाऱ्याविरोधात गुन्हा दाखल करण्यात आला आहे.
