जळगाव : शेतीकामात मामाला मदत म्हणून बैलांना पाणी पाजण्यासाठी गेलेल्या तरुणाचा कालव्यात पाय घसरुन बुडून मृत्यू झाला. ही घटना मंगळवारी दुपारी १२ वाजताच्या सुमारास जळगाव जिल्ह्यातील भडगाव तालुक्यातील महिंदळे या गावात घडली आहे. मयूर नरेंद्रसिंग ठाकरे (वय २२ वर्ष, रा. गणेशपुरा, ता. साक्री) असे मयत तरुणाचे नाव आहे. मयुर हा दहावीपासून महिंदळे येथे असलेल्या त्याच्या मामाकडे शिकण्यासाठी आलेला होता.

महिंदळे या गावात काही अंतरावर मयुरचे मामा देवासिंग नामदेव पाटील यांची शेती आहे. या शेताला लागूनच जामदा डावा कालवा आहे. घरी असल्यानंतर मयुर हा त्याच्या मामाला शेती कामात मदत करण्यासाठी शेतात जात जात होता, त्यानुसार मंगळवारी दुपारी मयुर हा मामासोबत गेला, मामा इतर कामात असल्याने मयुर बैलांना पाणी पाजण्यासाठी शेताजवळ असलेल्या कालव्यावर गेला.

या ठिकाणी बैलांना पाणी पाजत असताना, मयुरचा पाय घसरला व तो कालव्यात पडला, मयुरला पोहता येत नसल्याने आणि पाण्याचा प्रवाह जास्त असल्याने तो कालव्यात वाहत गेला. बराच वेळ झाला तरी मयुर परतला नाही, म्हणून मामासह इतरांनी शोध सुरु केल्यावर बैल सापडले, मात्र त्या ठिकाणी मयुर दिसला नाही.

मयुर कालव्यात पडला असावा या शंकेने कालव्याचे पाणी वाहत असलेल्या दिशेने जाऊन पाहिले असता, काही अंतरावर मयुर आढळून आला. त्याला तत्काळ ग्रामीण रुग्णालयात दाखल केल्यावर डॉक्टरांनी त्याला मयत घोषित केले.

एकुलत्या एका मुलाच्या मृत्यूने कुटुंबियांवर दुःखाचा डोंगर

मयत मयुरच्या पश्चात आई, वडील व एक बहिण असा परिवार आहे. मयुरचे वडील नरेंद्रसिंग हे धुळे जिल्ह्यातील साक्री तालुक्यातील गणेशपुरा येथील रहिवासी आहेत. मात्र ते व त्यांची पत्नी म्हणजेच मयुरची आई असे दोघेही नोकरी निमित्ताने मुंबईतील अंबरनाथ येथे वास्तव्यास आहेत. नरेंद्रसिंग ठाकरे यांनी मयुरला शिक्षणसाठी महिंदळे येथे आजी आजोबा व मामांकडे पाठवले होते.

दहावीपासून मयुर याठिकाणी शिकायला आला होता, आता तो भडगाव शहरातील सु. गी. पाटील महाविद्यालयात विज्ञान शाखेत पदवीच्या शेवटच्या वर्षाला शिक्षण घेत होता. मयुरची काही दिवसांपासून परीक्षा सुरु होती, परीक्षा संपल्यावर दोन दिवसांनी तो, आई वडिलांकडे जाणार होता, मात्र त्यापूर्वीच काळाने झडप घातली व मयुरचा कालव्यात बुडून मृत्यू झाला.

एकुलत्या एक मुलाच्या मृत्यूने मयुरच्या कुटुंबियांसह नातेवाईकांवर दुःखाचा मोठा डोंगर कोसळला आहे. अभ्यासात मयुर हा प्रचंड हुशार होता, मनमिळावू स्वभावामुळे गावकऱ्यांमध्येही त्यांची चांगली ओळख होती, अचानकच्या या दुर्दैवी घटनेने गावकऱ्यांमधूनही हळहळ व्यक्त केली जात आहे. या प्रकरणी भडगाव पोलीस ठाण्यात अकस्मात मृत्यूची नोंद करण्यात आली आहे. पुढील तपास पोलीस हेडकॉन्स्टेबल कैलास गिते व दत्ता मगर हे करीत आहेत.

हे वाचलंत का ?

• अश्लील फोटो व्हायरल करण्याची धमकी; भडगाव पोलिसात एका जणांविरुद्ध पोस्को कायद्यांतर्गत गुन्हा दाखल
• एरंडोलला युतीतर्फे भाजपचे डॉ.नरेंद्र ठाकूर यांना नगराध्यक्षपदाची उमेदवारी जाहीर
• शहापूर चोरीच्या घटनेतील आरोपी जामनेर पोलिसांनी शोधला ; – जामनेर पोलीसांची यशस्वी कामगिरी
• पाच मुलांच्या आईचे सूत जुळले 20 वर्षे लहान तरुणासोबत,दोघे राहिले लिव्ह-इन-रिलेशनमध्ये,तिला आठवणी आली पतीची, अन् भररस्त्यात…..
• अखिल भारतीय ग्राहक पंचायतच्या धरणगाव तालुकाध्यक्षपदी विनायक महाजन यांची नियुक्ती