मुंबई (गुरुदत्त वाकदेकर) : महाराष्ट्र नवनिर्माण सेनेचे प्रवक्ते आणि सरचिटणीस संदीप देशपांडे यांच्यावर झालेल्या हल्ल्या प्रकरणी एका मुख्य आरोपीसह दोघांना गुन्हे शाखेच्या अधिकाऱ्यांनी अटक केली. अशोक शंकर खरात आणि किसन पुरुषोत्तम सोलंकी अशी या दोघांची नावे असून ते दोघेही भांडुपचे रहिवासी आहेत. अशोक हा या कटातील मुख्य आरोपी असून शिवसेनेच्या माथाडी कामगार संघटनेचा पदाधिकारी आहे. त्याच्याविरुद्ध अनेक गंभीर गुन्ह्यांची नोंद असून यापूर्वी त्याच्यावर मोक्का कायद्यांतर्गत कारवाई झाल्याचे बोलले जाते.

राजकीय वादातून हा हल्ला झाला असला तरी स्वतःचा दबदबा निर्माण करण्यासाठी अशोकने हा हल्ला घडवून आणल्याचा संशय व्यक्त होत आहे. अटकेनंतर या दोघांनाही शनिवारी सायंकाळी किल्ला कोर्टात हजर करण्यात आले होते. यावेळी कोर्टाने दोघांना पोलीस कोठडी सुनावली आहे. या गुन्ह्यात इतर दोघांचा सहभाग उघडकीस आला असून आता त्यांचा पोलीस शोध घेत आहेत. संदीप देशपांडे शनिवारी सकाळी शिवाजी पार्क मैदानात मॉर्निंग वॉकसाठी गेले असताना

चार जणांच्या एका टोळीने त्यांच्यावर क्रिकेटच्या बॅटसह स्टॅम्पने प्राणघातक हल्ला केला होता. या हल्ल्यात त्यांच्या हाताला आणि पायाला गंभीर दुखापत झाली होती. प्राथमिक औषधोपचारानंतर त्यांना हिंदुजा रुग्णालयातून सोडून देण्यात आले होते. या हल्ल्यानंतर शिवाजी पार्क पोलिसांनी संदीप देशपांडे यांची जबानी नोंदवून घेऊन पळून गेलेल्या चारही मारेकऱ्यांविरुद्ध हत्येचा प्रयत्नासह शिवीगाळ करून जिवे मारण्याची धमकी दिल्याप्रकरणी गुन्हा नोंदविला होता.

शिवाजी पार्क व आसपासच्या परिसरात सुमारे अडीचशेहून अधिक सीसीटीव्ही फुटेजची पाहणी केल्यावर पोलिसांनी भांडुप येथून अशोक खरातसह किसन सोलंकी या दोघांनाही चौकशीसाठी ताब्यात घेतले. या संपूर्ण कटात ठाकरे कुटुंबीयांसह वरुण सरदेसाई यांचा सहभाग नव्हता, असे आतापर्यंत झालेल्या चौकशीतून उघडकीस आले आहे. मात्र तपासात येणाऱ्या प्रत्येक माहितीची शहानिशा होणार असल्याचे पोलिसांकडून सांगण्यात आले. या गुन्ह्याचा तपास शिवाजी पार्क पोलिसांकडून गुन्हे शाखेच्या खंडणीविरोधी पथकाकडे सोपविण्यात आला आहे.

हे देखील वाचा

• अश्लील फोटो व्हायरल करण्याची धमकी; भडगाव पोलिसात एका जणांविरुद्ध पोस्को कायद्यांतर्गत गुन्हा दाखल
• एरंडोलला युतीतर्फे भाजपचे डॉ.नरेंद्र ठाकूर यांना नगराध्यक्षपदाची उमेदवारी जाहीर
• शहापूर चोरीच्या घटनेतील आरोपी जामनेर पोलिसांनी शोधला ; – जामनेर पोलीसांची यशस्वी कामगिरी
• पाच मुलांच्या आईचे सूत जुळले 20 वर्षे लहान तरुणासोबत,दोघे राहिले लिव्ह-इन-रिलेशनमध्ये,तिला आठवणी आली पतीची, अन् भररस्त्यात…..
• अखिल भारतीय ग्राहक पंचायतच्या धरणगाव तालुकाध्यक्षपदी विनायक महाजन यांची नियुक्ती