वर्धा :- प्रेयसीचा साखरपुडा झाल्याचे समजताच एका माथेफिरु प्रियकराने नवरा मुलाचं घर गाठून घरासमोर जिवंत बॉम्ब ठेवल्याने मोठी खळबळ उडाली आहे. या घटनेची माहिती मिळताच पोलिस यंत्रणा सतर्क झाली आहे.विदर्भातील वर्धा जिल्ह्यातील आर्वी येथे हा धक्कादायक प्रकार घडला आहे. आर्वी येथील विठ्ठल वॉर्डात राहाणाऱ्या नवरा मुलाच्या घरासमोर एका पिशवीत बॉम्बसदृश्य वस्तू आढळून आली.
याबाबत तातडीने पोलिसांना माहिती देण्यात आली. पोलिसांनी पिशवी ताब्यात घेऊन त्यातील वायर्स कापून बॉम्ब निकामी केला. त्यामुळे मोठा अनर्थ टळला. या प्रकरणातील आरोपी दुसरा तिसरा कोणी नसून नवऱ्या मुलीचा प्रियकर असल्याचे स्पष्ट झाले आहे. प्रियकराने नैराश्येतून हे कृत्य केल्याचे पोलिसांनी सांगितले.
हात लावू नका अन्यथा मोठा स्फोट होईल…
पोलिसांनी दिलेल्या माहितीनुसार, वंदना ज्ञानेश्वर कारमोरे यांच्या घराबाहेर ठेवलेल्या पिशवीत बॉम्बसदृश्य वस्तू आढळून आली. वेगवेगळ्या रसायनांचे मिश्रण, त्याचबरोबर माचिसचा वापर करण्यात आला होता. तसेच कापडात गुंडळलेल्या स्फोटकाला इतर वायर्सही जोडलेल्या होत्या. पिशवीमध्ये टायमर आणि बॅटरी अशा गोष्टी होत्या. 7 वाजून 29 मिनिटं असा टाईम त्यावर दिसत होता. धक्कादायक म्हणजे पिशवीत दोन चिठ्ठ्या देखील आढळून आल्या आहेत.
हात लावू नका अन्यथा मोठा स्फोट होईल, अशा संदेश त्यात लिहिलेला आहे.पोलिसांनी बॉम्ब निकामी केला असून मोठा अनर्थ टळला आहे. वंदना कारमोरे यांचा मुलगा अमरावती येथील नवोदय विद्यालयात प्राध्यापक म्हणून कार्यरत आहे. मुलाचा नुकताच साखरपुडा झाल्याचे पोलिसांना समजले. त्यामुळे साखरपुड्याचा या घटनेशी काहीतरी संबंध असल्याचा संशय पोलिसांनी व्यक्त केला. त्यामुळे पोलिसांच्या संशयाची सुई कारमोरे यांच्या होणाऱ्या सुनेच्या दिशेने फिरु लागली.
मुलीची चौकशी केली असता या घटनेमागे तिच्या प्रियकराचा हात असल्याचे समोर आले. नैराश्येत प्रियकर आरोपीने हे कृत्य केल्याचे स्पष्ट झालं. पोलिस मुलीच्या कथित प्रियकराचा शोध घेत आहे. त्याने बॉम्ब कसा बनवला. त्याने या संदर्भात कुठे प्रशिक्षण घेतले. याचा पोलिस शोध घेत आहेत, अशी माहिती सहाय्यक पोलिस निरीक्षक प्रशांत पाटणकर यांनी दिली आहे.
हे पण वाचा
- अंगारिका चतुर्थीनिमित्त श्रीक्षेत्र पद्मालय येथे पहाटे महापूजा; भाविकांची गर्दी, प्रशासनाची चोख व्यवस्था
- एरंडोल तालुक्यात हळदी समारंभात गावठी कट्ट्यासह फिरणारा युवक अटकेत; जिवंत काडतूस जप्त.
- खरीप हंगामासाठी सज्जता; एरंडोल-पारोळा आढावा बैठकीत आमदार अमोलदादा पाटील यांचे मार्गदर्शन
- एरंडोलमध्ये बुद्ध जयंती समितीची बैठक उत्साहात संपन्न, सुमित उर्फ लकी शिंदे यांची अध्यक्षपदी सर्वानुमते निवड.
- ग्रामीण भागातील विक्रेत्यांकडून एरंडोल शहरात गुटख्याची विक्री, पोलीस प्रशासनासह अन्न व औषध प्रशासनाचे सोयीस्करपणे दुर्लक्ष.
