.
चंद्रपूर – एका तरूणीचा शिरच्छेद केलेला नग्नावस्थेतील मृतदेह आढळून आल्याने जिल्ह्यात खळबळ उडाली आहे. चंद्रपूर जिल्ह्यातील भद्रावती येथील ढोरवासा-पिपरी मार्गालगत सरकारी आयटीआयसमोरील शेत शिवारात अंदाजे 25 वर्षीय तरूणीचा हा मृतदेह आढळला आहे.
माहिती मिळताच पोलिसांनी घटनास्थळी पोहोचून मृतदेह ताब्यात घेतला आहे. मृतदेहाची ओळख पटलेली नसून फक्त धड सापडले आहे. पोलिस शेतात इतरत्र कोठे शीर सापडते का याचा शोध घेत आहेत. या घटनेने परिसरात एकच खळबळ उडाली आहे. सोमवारी सकाळी अकरा वाजताच्या सुमारास पोलिसांनी मृतदेह ताब्यात घेतला आहे.
आज सकाळी अकराच्या सुमारास भद्रावती पोलिसांना एका युवतीचा मृतदेह बेवारस फेकून दिला असल्याचा निनावी फोन आला होता. त्यानंतर पोलिसांचा ताफा सरकारी आयटीआय लगतच्या शेतशिवारात दाखल झाला. त्याठिकाणी पोलिसांना शिरच्छेद करून मृतदेह बेवारस फेकून दिल्याचे दिसून आले. मृतदेह नग्नावस्थेत आणि मुंडके नसलेल्या अवस्थेत होता.
दरम्यान, अप्पर पोलीस अधीक्षक अतुल कुलकर्णी यांनी घटनास्थळी दाखल होऊन पाहणी केली आणि तपासाच्या सुचना दिल्या आहेत. मृतदेह नग्नावस्थेत आढळल्याने सदर तरूणीसोबत अत्याचार करून क्रुरपणे हत्या करण्यात आल्याचा संशय व्यक्त केला जात आहे. भद्रावती येथे पोलिसांचा बंदोबस्त वाढविण्यात आला आहे.
