अमळनेर:- शहरात एक धक्कादायक प्रकार समोर आला आहे, ज्यामध्ये एका तरुणाचा मोबाईल हॅक करून त्याच्या बँक खात्यातून १ लाख रुपये काढून घेण्यात आले.ही घटना ७ जानेवारी रोजी दुपारी साडेचार वाजता घडली, ज्यामध्ये अज्ञात सायबर गुन्हेगारांनी ओटीपीच्या माध्यमातून ही फसवणूक केली.याप्रकरणी गुरूवारी ९ जानेवारी रोजी दुपारी ४ वाजता अमळनेर पोलीस ठाण्यात अज्ञात मोबाईलधारकावर फसवणूकीचा गुन्हा दाखल करण्यात आला आहे.
पोलिसांकडून मिळालेल्या माहितीनुसार, भावेश गणेश पाठक वय ३२ रा. शिवशक्ती चौक, अमळनेर हा तरूण आपल्या परिवारासह वास्तव्याला आहे. पिठाची गिरणी चालवून तो आपला उदरनिर्वाह करतो. मंगळवारी ७ जानेवारी रोजी दुपारी साडेचार वाजेच्या सुमारास त्याला मोबाईलवर अनेक मॅसेजेज असलेले दिसून आले. त्यात अज्ञात व्यक्तीने त्याचा मोबाईल हॅक करून आलेल्या ओटीपीच्या माध्यमातून त्यांच्या बँक खात्यातून परस्पररित्या १ लाख रूपये काढून फसवणूक केल्याचे दिसून आले. दरम्यान भावेशने बँकेत जाऊन बँक खाते फ्रीझ केले. त्यानंतर भावेशने अमळनेर पोलीस ठाण्यात धाव घेवून तक्रार दिली. त्यानुसार गुरूवारी ९ जानेवारी रोजी दुपारी ४ वाजता अज्ञात मोबाईल धारकावर फसवणूकीचा गुन्हा दाखल करण्यात आला आहे. पुढील तपास पोलीस निरीक्षक विकास देवरे हे करीत आहे.
