लोक ज्याला भिकारी समजायचे, घाणेरडे कपडे पाहून मदत करायचे, पैसे द्यायचे, तो सफाई कर्मचारी करोडपती निघाला आहे. बँक अधिकाऱ्यांनी पोलखोल केल्यानं सरकारी कर्मचाऱ्यांना एकच धक्का बसला.
अनेकांनी जो भिकारी वाटला, तो सफाई कर्मचारी कोट्यधीश निघाला आहे. या कर्मचाऱ्याच्या बँक खात्यात तब्बल ७० लाख रुपये आहेत. प्रयागराजमध्ये त्याच्या नावावर जमीन आणि घरदेखील आहे. विशेष म्हणजे गेल्या १० वर्षांत त्यानं बँक खात्यातून पगार काढलेला नाही.
कुष्ठरोग विभागात सफाई कर्मचारी असलेल्या धीरजच्या खात्यात गेल्या १० वर्षांपासून पैसे जमा होत आहेत. मात्र एकदाही त्यानं पैसे काढले नाहीत. त्यामुळे बँक अधिकारी कोड्यात पडले. त्यांनी धीरजला बँक खात्यातून पैसे काढण्यास सांगितले. मात्र धीरजचा खर्च लोकांकडून पैसे मागून चालतो. त्यामुळे त्याला उदरनिर्वाहासाठी बँकेतून पैसे काढण्याची गरज पडली नाही. धीरजचे कपडे, त्याचं राहणीमान पाहून अनेक जण त्याला भिकारी समजायचे. तो लोकांच्या हातापाया पडायचा. त्यामुळे लोक त्याला पैसे द्यायचे.
सीएमओ कार्यालयात अस्वच्छ कपडे घालून जाणाऱ्या, पैसे मागणाऱ्या धीरजचं पितळ बँक अधिकाऱ्यांमुळे उघडं पडलं. धीरजला शोधत शोधत बँक कर्मचारी कुष्ठरोग विभागात पोहोचले. त्यांनी तिथल्या काही कर्मचाऱ्यांकडे धीरजबद्दल विचारणा केली. त्यावर तो फारच गरीब असल्याचं कर्मचाऱ्यांनी सांगितलं. हे ऐकल्यावर अधिकाऱ्यांनी सत्य सांगितलं. धीरजच्या खात्यात ७० लाख रुपये असल्याचं, त्यानं १० वर्षांत खात्यातून पैसेच काढले नसल्याचं ऐकून कर्मचाऱ्यांना धक्काच बसला.
धीरजचे वडील जिल्हा कुष्ठरोग विभागात सफाई कर्मचारी म्हणून कार्यरत होते. नोकरीवर असताना त्यांचा मृत्यू झाला. त्यामुळे धीरजला २०१२ मध्ये अनुकंपा तत्त्वावर नोकरी मिळाली. तेव्हापासून आजतागायत त्यानं बँकेतून पगार काढलेला नाही. लोकांकडून मिळणाऱ्या पैशांतून त्याचा चरितार्थ चालतो. विशेष म्हणजे धीरज सरकारकडे आयकरदेखील जमा करतो.
